🌷🌷चौथ माता की पुजा और कथा मारवाङी मे 🌷🌷

                

                      🌹🌹चौथ का व्रत🌹🌹

             अगर कोई तेरहूँ चौथ कर, तो हर महीना की बदी की

           चौथ न कर।व्रत-पूजा तो कार्तिक की चौथ की जइयाँ ही कर

           सिर्फ बाणो चीनी पर निकाल और कहानी इन दोनूं म स कोई

               भी सुन।

                           🌻🌻  चौथ की कहानी 

    एक बुढ़िया माई क ग्वालियो-बछलियो नाम का बेटा

     था। बुढ़िया माई बेटा क लिये बारा महीना की बारूँ चौथ करती।

    बटो  लकड़ी ल्याया करता और दोनूँ माँ बेटा ऊन बेच कर गुजार

   करते । बुढ़िया माई रोजिना लकड़ियां म स दो लकड़ी अलग रख

   लेती और चौथ क दिन बेटा स ओलग बेच कर समान ल्याती

   और पाँच चूरमा का लाड्डू बनाती।लड्डू एक आप खाती और

   बेटा न खिलाती।

  एक चौथ क दिन बेटा आपनी पड़ोसन क गयो।वा भी

 चुरमो बना राखी थी, तो पूछयो कि आज के ह, सो थे चूरमो

  बनाया हो। पड़ोसन बोली कि म्हे तो आज ही बनाया, हाँ तेरी माँ

  तो हर चौथ क दिन बनाव है, त न आज खा न दियो कि नहीं।

  बेटो बोल्यो दियो तो थो। पड़ोसन बोली कि तूं लकड़ियाँ लाव,

   जिक म स तेरी माँ ओलबे चकर चूरमो बनाव। बेटो, माँ क

    गयो, बोल्यो कि म तो इतनी मेहनत स लकड़ी ल्याऊँ और तू

  चूरमा कर-कर क खाव, सो के तो मन छोड़ दे, के चौथ माता

      न छोड़ दे।

   माँ बोली, बेटा, म तो तेर लिये ही बरत करूँ हूँ, सो त न

 भलाई छोड़ देऊँ, चौथ-माता न तो कोनी छोडूं। जना बेटो घर स

 जान लग्यो, तो माँ बोली कि तू जाव चौथ माता को नाम पूर

 दिये, संकट दूर हो जासी। बेटो सोच्यो कि है तो झूठी बात, पन

 आपना के लियो ले लेवां। घर स चल्यो, थोड़ी दूर गयो होवगो

   कि देखता खून की नदी भव ह, कैठीन स भी कोनी रास्तो

  कोनी। जद आखा पूर कर बोल्यो कि हे चौथ माता, अगर या

  नदी सूख कर रास्ता हो जाव, तो तूं साच्ची है। इतना म ही नदी

  सूख कर रास्ती होगी।

 आग सो गयो, तो जातां बावनी ऊजाड़ म रात होगी,

  चारूँ तरफ बाघ-बघेरा बोल न लाग्या। जद आखा पूर कर

।बोल्यो कि हे चौथ माता, मन रास्तो मिल जाव, नहीं तो ये

जानवर म न खा जासी। इतना म ही रास्तो मिलगो। आग एक

राजा की नगरी म गयो। राजा हर महीना एक आदमी की बलि

देतो। एक बुढ़िया माई क घर म गयो देख तो माई पूड़ा तो पोती

जाव है, सा-साग रोती भी जाव, जद वो पूछ्यो कि माई रोव क्यूँ

है। बुढ़िया बोली कि मेर एक ही बेटो है, बी राजा क बलि चढ़न

जासी, ये पूड़ा ऊँक लिये बनाऊँ हूँ। बी बोल्यो कि माई ये पूड़ा

मन भर पेट खिला दे, म तेरा बेटा क बदले चल्यो जाऊँगा।मांई

ऊन पूड़ा खिला दिया। रात न सोती समय बोल्यो कि राजा को

बुलाओ आव, तो मन उठा दिये।

आधी रात न बुलाओ आयो। माई सोच न लगी कि पराये

पूतन कैयां बलि चढ़वा देऊ, पन इतना मही वा उठगो और जान

लग्यो, तो बुढ़िया माई न बोल्यो कि मेरी कोथली और लाठी धरी

राखियो।माई सोची कि आज तक ही कोई पाछी कोनी आयो,

यो के आसी। राजा का आदमी उनलेगा और आवा म चिण

दियो।जद वो आखा पूर कर बोल्या कि हे चौथ माता! दो संकट

तो टाल दिया, यो भी तूं ही टालिये। इतना म आवो पक क तैयार

होगी। दो तीन दिन बाद आवा क न छोरा खेल था। आवा पर

कंकरी मारी, तो ऊम आवाज होई। छोरा राजा न जाकर बोल्या

कि राजा, तेरी आवो पकगी।

राजा सोच्यो कि छ महीना म आवो पकती तीन दिन म

कैयां पकगी। जाकर देख, तो सोना-चाँदी का कलश होगा।

ऊतार न लग्या, तो अन्दर स बोल्यो कि धीर-धीर उतारो, मांय

मानस को काम है। राजा का आदमी बोल्या कि इम तो कदेई

कोनी बोलती, आज कुन भूत-दैत्य बोलन लगयो। अन्दर स

बोल्यो कि म तो वो ही आदमी हूँ, जिकानथे बैठायो थो। अन्दर

जाकर देख, तो हर्या-हर्या झुवारा ऊगऱ्या है, आँखा पूर कर

बैठ्यो है। राजा का आदमी राजा न सारी बात बताई, तो राजा

आयो और पूछयो कि तुं कुन है और कैयां बचगो।

वो बोल्यो कि मेरी मां चौथ का व्रत कर, सोम तो चौथ.

माता क प्रभाव स बचगो। जना राजा उन बोल्यो कि एक घोड़ा

पर तूं चढ़ जा, एक घोड़ा प म चढ़ा जाऊँगा और तेर हाथ पैर म

साँकली घाल देवांगा, अगर साँकली खुल कर मेर बन्ध जासी,

तो चौथ माता साच्ची है। दोनूं घोड़ा पर चढ़गा, तो बो आखा

पूरा कर बोल्या कि हे चौथ माता, मेरी लाज राखिये। इतना म ही

साँकली खुल कर राजा क बन्धगी। राजा सोच्चो चौथ माता

सच्ची है। राजा आपनी बेटी को ब्याह ऊं क साग कर दियो।वो

बठ ही रहन लाग्यो । बोला सारा दिन होगा, एक दिन वो आपनी

घरवाली न बोल्यो कि आज तो म्हार गांव कानी बिजली चमक

रानी पूछो कि थार गांव भी है के । बोल्यो मेर एक माँ भी

है, अब आपा देस चालांगा। राजा ऊंना न भोत सारो धन देकर

बिदा कर दियो। ऊरी न बुढ़िया माई स लकड़ी तो काटी कोनी

जाती सो गोबर चुन कर, छाणा बेच कर रोटी खाती। पड़ोसन

ऊंका बहू-बेटा न आता देखकर बोली कि बुढ़िया माई तेरा

बेटा-बहू आव है, भोत सारो धन ल्याया है। बुढ़िया माई बोली

कि मेरा करम म कठ बेटा-बहू लिखेड़ा है, एक बेटो थो जिको

न तूं लगा-सीखा कर काढ़ दियो। पन जी मान्यो कोनी, बटोड़ा

पर चढ़ कर देख, तो साचां ही आव है। बेटा-बहू सासु क पंगा

पड्या और बोल्या कि म्हे तो चौथ माता क प्रभाव स ही पाछा

आया हो। सारी नगरी म हेलो फिरा दिया कि बेटा की माँ, पुरुष

की पत्नी सब कोई चौथ को व्रत करियो। तेरह चौथ करियो।

तेरह नहीं तो चार-चार नहीं तो दो तो सब कोई करियो। हे चौथ

माता! जिसे बुढ़िया माई क बेटा को संकट कट्यो, जिसे सबको

काटिये, कहतां को, सुनतां को, हुंकारा भरता को, अपना सारा

परिवार को काटिये।

🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲

  

  🌺🌺 🌾🌾बिन्दायकजी का गीत🌾🌾🌺🌺

बिन्दायकजी स्याणा, ल्वा व धन का बाणा।

म्हारा बिन्दायकजी भोला,भर धन का झोला।

म्हारा बिन्दायकजी सुद्दा, कर धन का कुड्डा।

म्हारा बिन्दायकजी दादा, ल्या व धनका गाडा

हे बिन्दायकजी महाराज, भर्या आइयो, रीता जाइयो।

बिन्दायकजी बाबो रंगो: चांगो, भरी बाड़ी म फिर सुरंगी।

रानी ध्यावम्हे राज न म्हे म्ध्यावा म्हारकाज ना

रानी को राज बध गो, म्हारो कारज सध गो।

पोता बहू की राबड़ी, दोयता बहू की खीर।

मीट्ठी लागी राबड़ी, खाट्टी खीर।

हे महाराज सटक बिन्दायकजी, घोड़ा की हिनहिनाहट दिये।

बांदी की भनभनाहट देई, कुणो भर्यो खुडियां की दिये।

देली भरी खुंसड़ा की देई, घर सांकलो-पंथ मोकलो दिये।

खूटी हार, सेज भरतार, पूत पाल न, कड़ावण दूध दियो।

हे बिन्दायकजी महाराज, सबका कारज सिद्ध करियो।

घर म सुख-सम्पत्ति की राज करियो, मुक्ति दियो।

🍁🌲🍁🌲🍁🌲🍁🌲🍁🌲🍁🌲🍁🌲🍁🌲🍁🌲🍁🌲🍁🌲🍁🌲         

   🌺🌼🌹 जय चौथ बिन्दायकजी🌹🌼🌺

🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺